Abanyarwanda barara bamenye urusha abandi amahirwe yo gutsinda amatora

Umunyamabanga nshingwabikorwa wa Komisiyo y’igihugu y’amatora Charles Munyaneza yatangaje ko uyu munsi abanyarwanda barara bamenye umukandida urusha abandi amahirwe yo gutsinda amatora ya Perezida wa Repubulika.

Ubusanzwe amategeko asaba ko mu minsi irindwi nyuma yo kurangiza amatora komisiyo y’igihugu y’amatora igomba kuba yabwiye abanyarwanda ibyavuye mu matora ku buryo bwa burundu.

Gusa Munyaneza yabwiye itangazamakuru kuri uyu wa 03 Kanama ko kuwa 04 Kanama Komisiyo y’amatora izakora uko ishoboye kose ikarara itangarije abanyarwa urusha abandi amahirwe yo gutsinda amatora kuko abanyarwanda babyifuje.

Yagize ati: "Hari n’icyifuzo cy’abanyarwanda benshi batugezaho bifuza kutaryama batamenye nibura icyerekezo, batamenye umuntu ufite amahirwe yo kuzatsinda ariya matora akayobora u Rwanda mu myaka iri imbere."

Kubera iki cyifuzo, Munyaneza yavuze ko komisiyo y’amatora ejo izakora uko ishoboye kose abanyarwanda bakarara bamenye urusha abandi amahirwe yo gutsindira kuyobora u Rwanda.

Ati: "Nicyo gituma tuzakora uko dushoboye kose ntiturenze isaa yine, isaa yine n’igice tutarababwira icyerekezo aya matora afite, ejo rero mu masaa tanu (z’ijoro) abanyarwanda bakaba babemenye ufite amahirwe yose yo kuzatsindira umwanya wa perezida wa Repubulika.”

Kalisa Mbanda uyobora komisiyo y’Amatora yavuze ko bazatangaza by’agateganyo ibyavuye mu matora kuwa gatandatu tariki 05 Kanama maze bakazatangaza uwatsindiye umwanya wa Perezida bya burundu bitarenze iminsi irindwi nyuma y’amatora.

Munyaneza yshimiye abakandida kuba barakurikije amategeko mu kwiyamamaza ndetse anashimira ko ahari ibirango byose byamamaza abakandida byose byahakuwe nkuko amategeko abisaba ko bikurwaho mu masaha 24 mbere y’amatora.

Munyaneza yavuze ko yizeye ko abanyarwanda bazitabira amatora ku bwinshi kandi akagenda neza nkuko bisanzwe mu Rwanda.

Yavuze ko nubwo abanyarwanda baba mu mahanga batoye kuri uyu wa 03 Kanama badashobora gutangaza ibyavuye muri ayo matora mbere ahubwo ngo bazabitangariza rimwe kuko bazatangira kubarura amajwi yose ejo saa cyenda.

Abakandida bahatanira kuyobora u Rwanda ni Paul Kagame watanzwe na FPR Inkotanyi agashyigikirwa n’andi mashyaka umunani; Dr Frank Habineza wa Green Party n’umukandida wigenga Phillippe Mpayimana.

Yisangize Inshuti.

Ibitekerezo

Tanga Igitekerezo