Bugesera: Mvura nkuvure yatumye abakoze jenoside n’abayirokotse bunga ubumwe biteza imbere

Abaturage batuye mu Kagari ka Musovu mu murenge wa Juru ho mu Karere ka Bugesera mu ntara y’Uburasirazuba barivuga imyato y’uko ubumwe n’ubwiyunge babugize ubwabo babikesha gahunda ya Mvura nkuvure ya Duhumurizanye Rwanda

Aba baturage bari kuvuga ibi ni abakoze Jenoside bakemera icyaha bakababarirwa ku bw’Itangazo rya Perezida wa Repubulika,hakaba n’abandi barokotse Jenoside yakorewe Abatutsi muri Mata 1994 kuri ubu bavuga ko bamaze kubabarirana babikesha gahunda ya Mvura nkuvure bafashwamo n’Umuryango Duhumurizanye Rwanda.

Bamwe mu baturage baganiriye na Makuruki batubwiye ko batiyumvishaga ukuntu baba bariciye bagenzi babo muri Jenoside yakorewe abatutsi ngo bumve ko bavugana bakanaganira mu buzima busanzwe ariko ngo Gahunda ya Mvura nkuvure yarabibafashije kuri ubu babanye neza iwabo.

Uwimana Aurelie atuye mu kagari ka Musovu mu Murenge wa Juru avuga ko yari afite ibikomere ku mutima agira mahirwe yo kuba umwe mu batanga ibiganiro byo kuganiriza abafitanye ibibazo hagamijwe kubunga nabo babikesha amahugurwa baherewe i Nyamata mu karere ka Bugesera.

Nyuma yo kuva mu Mahugurwa babanje kujya bareba abantu baba bafite ibikomere ku mitima yabo cyane nk’abapfakajwe na Jenoside yakorewe abatutsi mu Rwanda. Baje kubegera barabaganiriza baza gushyiraho itsinda bahuriramo bakanakusanya amafaranga bakanagurizanya kugira ngo biteze imbere none ubu bakaba bameze neza yaba ku mutima no kumubiri.

Uwimana yakomeje agira ati:’’iyo ubonye nk’Umuntu wiciye undi muri Jenoside atinyuka akatura akavuga uko yabigenje akaza kubabarirwa ,ukabona n’uwo yiciye amubabarira, ikiba gisigaye ni ukubana neza iwabo mu Muryango bityo bagakataza mubikorwa bibateza imbere’’.

Ngendahimana Sebastien na we atuye i Musovu ho mu Murenge wa Juru, yarokotse Jenoside yakorewe abatutsi muri Mata 1994, tuganira yagize ati: ’’mbere ntitwaganiraga n’abatwiciye kubera ibikomere ariko gahunda ya mvura nkuvure aho iziye ubu turasangira kuko umwe arahisha Ubushera agatumira undi bityo twanibumbiye mu matsinda yo kuzigama no kugurizanya ugasanga tutishishinya, ubu dukataje mu bikorwa byaduteza imbere aho kubana twishishanya’’.

Habiyaremye Pascal ni umwe mubakoze Jenoside yakorewe abatutsi mu Kagari ka Musovu mu Murenge wa Juru,tuganira yagize ati:’’maze kwirega no kwemera icyaha nkaza gutaha k’ubwimbabazi za Nyakubahwa Perezida wa Republika kuri ubu nshimishwa no kubona nganira n’abo nahemukiye tukaba tubana no mu matsinda yo kuzigama,bityo rwose hano iwacu Juru tubanye neza,yaba uwishe n’uwiciwe.

Kanani Venuste ni Umunyamabanga Nshingabikorwa w’Akagari ka Musovu mu Umurenge wa Juru mu Karere ka Bugesera, tuganira yagize ati:’’iyi gahunda ya Mvura nkuvure yanatumye n’abandi baturage baboneraho nabo bakajya banarwanya amakimbirane iwabo mu miryango bityo nta bibazo byinshi bikigaragara muri aka Kagari nyoboye!Ndetse n’abashaka kuzana amakimbirane iwabo tubahuriza muri ayo matsinda ugasanga ibibazo bibaye bicye aho kuba byinshi bikaba byanatuma abaturage batiteza imbere uko bikwiye’’.

Ndizeye Benjamin ni Umuhuzabikorwa wa Gahunda ya Mvura nkuvure mu Muryango Duhumurizanye iwacu Rwanda tuganira kuri gahunda y’ubumwe n’ubwiyunge yagize ati :"iyo ubona abakoze Jenoside baganira batishishanya n’abo biciye ababo muri Jenoside ugasanga babanye neza iyi ni gahunda mbere ya byose tunashimira Leta y’ubumwe bw’Abanyarwanda kubera ko yashyizeho Komisiyo y’ubumwe n’ubwiyunge ,byatumye umuyango nyarwanda ubana neza nta kwishishanya."

Yakomeje avuga ko Mvura nkuvure ari gahunda idakenera ingengo y’imari ihenze, ati:’’muri make nta faranga na rimwe dutanga muri Mvura nkuvure, icyo tubaha ni ibiganiro binyuze mu matsinda,urabona rero ko icyo tubigisha ni ukubumvisha ko ibyo bakora ari ibyabo ko aribo bifitiye akamaro ,barahura bakanasabana, iyo bagabana ayo bakusanyije mu matsinda babikesha ibiganiro tuba twarabahaye! Ubutunzi abaturage bibitsemo urabona ko babubyaje umusaruro ntibabupfushije ubusa”.

Gahunda ya Mvura Nkuvure mu Karere ka Bugesera imaze imyaka itatu ikaba ari iy’Umushinga Duhumuzanye iwacu Rwanda bahuza kandi bakongera kubanisha neza imiryango ibanye nabi cyane imiryango yakoze Jenoside n’iyayikorewe ndetse n’indi miryango ibanye mu makimbirane,bakaba banakorera no mu Karere ka Gatsibo naho mu Ntara y’Uburasirazuba.

Lucien KAMANZI
Makuruki.rw


Gitifu w’Akagari ka Musovu

Yisangize Inshuti.

Ibitekerezo

Tanga Igitekerezo