Tugomba gufata ingamba zihamye mu kwirinda Kanseri- Jeannette Kagame

Madamu wa Perezida wa Repubulika y’u Rwanda ,Jennette Kagame, yasabye abatuye isi gufata ingamba zihamye mu kwirinda kanseri kuko ahanini ibiyitera bishobora kwirindwa.

Ibi yabitangarije mu nama yateraniye i Kigali kuri uyu wa 07 Ugushyingo 2017 y’Umuryango Nyafurika ukora ubushakashatsi n’amahugurwa ku ndwara ya Kanseri.

Iyi nama yari ifite intego yo gushaka ibisubizo ku kibazo cy’ubwiyongere bukabije bwa Kanseri muri Afurika no ku isi muri rusange.

Muri 2015 ishami ry’umuryango w’abibumbye ryita ku buzima (OMS) ryerekanye ko buri mwaka kanseri yica abantu bakabakaba Miliyoni icyenda (miliyoni 8.8) kandi muri bo 70% bakomoka mu bihugu bikiri mu nzira y’amajyambere byiganjemo ibyo muri Afurika. Afurika kandi yonyine yihariye 60% by’abarwaye kanseri ku isi.

Madamu Jeannette Kagame yibukije abanya-Afurika bose ko Kanderi ari icyorezo gihangayikishije uyu mugabane abasaba guhagurukira rimwe bagafatanya gufata ingamba zihamye mu kuyirinda kuko ari indwara itarobanura.

Yagize ati: " Kanseri ntirobanura imyaka, igitsina, idini, cyangwa urwego umuntu yaba arimo. Mu Rwanda twababajwe no kubona uburyo abana n’abakuze bibasirwa n’iyi ndwara."

Yagaragaje ko mu Rwanda Abagabo bibasiwe na Kanseri ifata igitsina gabo, abagore bakaba bibasiwe na kanseri y’amabere n’iy’inkondo y’umura, gusa ngo abana na bo ntibasigaye kuko bibasiwe n’iyi ndwara ikunze kubafata ibice bitandukanye by’umubiri.

Jeannette Kagame yagaragaje ko ubushakashatsi bwerekana ko kimwe cya gatatu cy’ibitera kanseri bishobora kwirindwa aheraho asaba ko abanya-Afurika bose bakwiye guhaguruka bagafata ingamba zo kwirinda kanseri.

Ati: " Ubushakashatsi bumaze igihe bwerekanye ko hafi ya kimwe cya gatatu cy’ibibazo bya kanseri bishobora kwirindwa, twebwe rero nk’abatuye isi, dufite inshingano yo gushyiraho uburyo bwizewe kandi buhamye bwo kuyirinda."

Yavuze ko abantu bakwiye kwirinda cyane ibintu bitera kanseri bishobora kwirindwa nk’ibikomoka ku mibereho ya buri munsi na sosiyete abantu babamo. Ibi yabivuze abishingiye ku kuba ubushakashatsi bwerekana ko 80% bya kanseri ifata abantu bakuru iterwa n’imyitwarire irimo kunywa itabi, inzoga, kurya cyane ibikomoka ku matungo n’ibinure. Bigaragaza ko habayeho kwirinda bene iyi myitwarire Kanseri ishobora kugabanuka.

Yibukije abantu ko kwisuzumisha kanseri hakiri kare ari ngombwa ndetse anavuga ko hakwiye kubaho uburyo bwiza bwo guhererekanya amakuru kuri kanseri.

Ku ruhande rw’u Rwanda, Jennette Kagame yavuze ko byibura 95% by’abangavu bakingiwe kanseri y’inkondo y’umura ndetse hakaba harashyizwe uburyo bwo gusuzuma no gukingira Kanseri mu bitaro bya Butaro mu Majyaruguru y’u Rwanda.

Ibyo bitaro bya Butaro byakira nibura abarwayi 1000 ba kanseri ku mwaka kuko kuva byatangira mu 2012 kugera mu 2016 byari bimaze kwakira abasaga 6000.

Yavuze ko u Rwanda nk’igihugu kigamije kugera ku iterambere rirambye kitazacika intege mu kurwanya kanseri kandi anavuga ko mu mwaka utaha mu bitaro bya Gisirikare hazashyirwa uburyo bwo gufasha abafite ibibazo bya Kanseri.


Jennette Kagame yasabye abatuye isi kurwanya no kwirinda kanseri

Yisangize Inshuti.

Ibitekerezo

Tanga Igitekerezo