De Gaulle yongeye kwibasira abanyamahanga bakiniye Amavubi

Umuyobozi w’ishyirahamwe ry’umupira w’amaguru mu Rwanda Nzamwita Vincent De Gaulle yongeye kugaragaza ko abanyamahanga bakiniye Amavubi batitangaga ngo bakinishe umutima ahubwo avuga ko abanyarwanda bari kuyakinira ubungubu ari bo bitanga kuko batsinze Ethiopie

Ubwo ikipe y’u Rwanda yavaga muri Ethiopie ku mugoroba wo kuri uyu wa mbere izanye itsinzi y’ibitego 3 kuri 2 batsinze ikipe y’igihugu ya Ethiopie iwayo yazanye na Perezida wa FERWAFA Nzamwita Vincent De Gaulle.

Uyu muyobozi yashimiye cyane aba bakinnyi batsinze ikipe ya Ethiopie mu rugo bakaba bazanye icyizere cyo kujyana u Rwanda muri Maroc mu mikino ya CHAN.

Nzamwita yagaragaje ko icyatumye batsinda ari uko bakinana umutima ukunda ikipe bitandukanye n’abo yita abanyamahanga bakiniye u Rwanda mu bihe byashize.

Ati :”Aba bana b’Abanyarwanda bakinisha umutima ntabwo, twavuye muri bya bindi byo gukinisha abanyamahanga, biriya byari bifite umusaruro wabyo ariko ubu aba bana bakinisha umutima bakamenya ko bambaye ibendera ry’igihugu. Baba bafite ishyaka ryabo, kubashyira hamwe nibyo byabafashije bagakina nk’ikipe, aribo ari n’abatoza bakumva ko bafite intego imwe. Icyo gihe ikintu cyose kiva hanze kiza guhungabanya ishyaka n’intego zabo baracyirengagiza bakagica amazi.”


Perezida wa FERWAFA De Gaulle yashimiye ubwitange bw’abakinnyi b’abanyarwanda

Aba bakinnyi b’Amavubi batsinze Ethiopie mu mukino wa kamarampaka w’amahirwe ya kabiri bahawe na CAF kuko Misiri yanze kwitabira CHAN. Mbere bari batsinzwe na Uganda ibitego 3 ku busa ndetse iranabasezerera iba ariyo ibona tike yo kujya muri CHAN biciye mu nzira zisanzwe.

Aba bakinnyi b’abanyamahanga bakiniye u Rwanda guhera nyuma ya jenosdie yakorewe abatutsi baciwe mu Mavubi guhera mu mwaka wa 2014 nyuma y’uko CAF ihannye u Rwanda ko rwakinishije Birori Daddy wakiniraga ku byangombwa bibiri n’imyirondoro irenze umwe.

Baciwe mu Rwanda nyuma y’uko bamwe muri bo barufashije gutwara CECAFA yo mu mwaka wa 1999 ari na yo yonyine rufite. Aba banyamahanga kandi ni bo bafashije u Rwanda kujya muri CAN ya 2004 bwa mbere mu mateka yarwo rukaba rutaranasubirayo.

Bazibukirwa kandi ku mikino ikomeye bagiye batsinda irimo uwo bakinnye na Uganda ndetse na Ghana yafashije u Rwanda kujya muri iyi CAN ya 2004.

Benshi muri aba banyamahanga ubu bamaze kwamburwa ubwenegihugu ntibakemerewe kwitwa abanyarwanda cyeretse bahereye hasi bagashaka ubwenegihugu mu buryo bwemewe n’amategeko y’u Rwanda.

Si ubwa mbere uyu muyobozi anenze aba banyamahanga bakiniye Amavubi kuko no mu ntangiriro z’uyu mwaka yumvikanye avuga ko n’ubwo u Rwanda rwagiye muri CAN bitabarwa ngo kuko rwajyanyweyo n’abanyamahanga bityo ko u Rwanda batabara ko rwagiye muri CAN.

Yisangize Inshuti.

Ibitekerezo

Tanga Igitekerezo