Tour du Rwanda 2017: Alleluya Joseph yegukanye agace ka Kigali-Huye

Mu isiganwa rya Tour Du Rwanda 2017, agace ka mbere ka Kigali-Huye mu ntera y’ibirometero 120 na metero 300 kegukanwe na Alleluya Joseph yanikiye bagenzi be.

Aleluya Joseph yakoresheje amasaha 3 iminota 12 n’amasegonda 12, akaba yasize uwamukurikiye umunota n’amasegonda 34 yose akaba yanahise afata umwanya wa mbere ku rutonde rusange ndetse akaba anararanye umwenda w’umuhondo.

Uwakurikiye Aleluya ni Main K (DDC), hakurikiraho Mebrahtom (Eri)
Eyob M. (DDC) aba uwa kane mu gihe uwa gatanu yabaye Debretsion A. (Eri)

Abasiganwa bahagurutse muri gare ya Kacyiru saa 10h15’ berekeza mu Karere ka Huye aho babanje kunyura ku Kinamba, bakerekeza ku Muhima kuri YAMAHA bameze nk’abari mu myiyereko , bakabona kwerekeza Nyabugogo bakomerezaho I Huye.

Ni ibyishimo ku banyarwanda nyuma yo kuba Nsengimana Jean Bosco yegukanye agace kabanziriza Tour du Rwanda (Prologue), none uyu munsi Umunyarwanda Aleluya Joseph akaba yongeye gutanga ibyishimo yegukana agace ka Kigali-Huye.

JPEG - 264.2 kb
Alexis Nzeyimana yerekanye guhanga gukomeye cyane

Umunyarwanda Alexis Nzeyimana niwe wegukanye amanota ya mbere yo kuzamuka umusozi wa Ruyenzi, gusa Samuel Hakiruwizeye na we yakomeje kugaragaza ko afite inyota yo kwegukana aka gace ka Kigali-Huye.

Ntibyatunguranye cyane kuba Nsengimana Jean Bosco ategukanye aka gace ka Kigali-Huye, kuko ntibikunze kubaho ko umukinnyi wegukanye agace ka mbere ka Tour du Rwanda (Prologue) yongera akegukana akandi gace ku munsi ukurikiyeho w’irushanwa.

Kuri uyu wa kabiri tariki 14, Ugushyingo 2017, hitezwe ko baza guhaguruka i Huye berekeza mu Karere ka Rubavu, aho bazasiganwa intera ingana n’ibilometero 180.

Ku munsi wo kuwa gatatu ni ikiruhuko, kuwa kane bazahaguruka i Rubavu berekeza i Musanze mu ntera ireshya na Kilometero 95, naho kuwa gatanu tariki ya 16 Ugushyingo 2017, abasiganwa bazava i Musanze berekeza i Nyamata ku ntera ya Kilometero 121, ku munsi ukurikiye bazerekeza i Rwamagana ku ntera ya kilometero 93.1.

Biteganijwe ko abasiganwa bazava i Rwamagana berekeza i Nyamirambo kuwa 18 Ugushyingo 2017 ku ntera ingana na kilometero 86.3.

Ku munsi wo ku Cyumeru ari na bwo biteganijwe ko iri rushanwa rizasozwa, abasiganwa bazazenguruka Umujyi wa Kigali, ku ntera ingana na Kilometero 120, aribwo tuzamenya ubashije kwegukana Tour du Rwanda 2017.


Alellua Joseph ageze ku murongo

Niwe wahise wambikwa umwenda w’umuhondo

Uko 10 bakurikiranye mu gace ka Kigali-Huye


Uko 5 bakurikirana ku rutonde rusange

1- Aleluya Joseph (DDC)
2- Nsengimana J. (RW)
3- Ndayisenga V (TIR)
4- Debod S. (DDC)
5- Kangangi S. (BAI)

JPEG - 107.1 kb
Abasiganwa bahagurutse i Kigali berekeza i Huye

JPEG - 187.2 kb
Abitabiriye iri siganwa bagera kuri 73
Yisangize Inshuti.

Ibitekerezo

Tanga Igitekerezo