Kwamamaza

IYOBOKAMANA

Musenyeri Nzakamwita atewe impungenge n’utudini tuzana ’business’ mu iyobokamana

Yanditswe

kuya

na

Jean Paul Niyitanga
Musenyeri Nzakamwita atewe impungenge n’utudini tuzana ’business’ mu iyobokamana

Musenyeri Sylverien Nzakamwita wa diyosezi ya Byumba

Musenyeri wa Diyosezi ya Byumba, Sylverien Nzakamwita, yavuze ko Kiliziya Gaturika ndetse na Leta batewe impungenge n’umuvuduko w’ivuka ry’amadini avuka umunsi ku wundi kuko ngo kuri we abona ayo madini atagamije kwigisha iyobiokamana nyakuri ahubwo baraje mu bucuruzi no kwishakira indonke mu bantu.

Ibi yabitangaje kuri uyu wa 29 Ukwakira 2017. Musenyeri Nzakamwita yavuze ko muri iyi minsi hari amadini ashingwa n’abantu badafite ubumenyi bagamije kwisakira indonke mu bantu no kurarura urubyiruko bakoresheje imbyino n’imiziki barangiza bakarujyana mu bidakwiye.

Musenyeri Nzakamwita yagize ati: "Umuvuduko w’amadini natwe wagiye udutonda,hari amadini azwi dukorana, ayo madini rwose yo turayashima kuko ibyo akora natwe nibyo dukora, turanakorana, ariko hari n’utudini tudini twumva duteje ikibazo mu buzima bw’iyobokamana kuko bamwe rwose usanga barabigize business (ubucuruzi) bakabigira uburyo bwo kwishakira indonke ukagirango ni nko kwihangira imirimo. Tugerageza kubana na bo, tukagerageza no kubabwira uko bakwiye kwifata ariko sinakubeshya rwose ayo madini adutera ibibazo ndetse abitera n’igihugu cyacu"

Agaruka ku bibazo aya madini ateza muri kiliziya gatulika mu Rwanda, Musenyeri Nzakamwita yagize ati: "Icya mbere baza gushaka abayoboke iwacu cyane cyane mu rubyiruka kandi uko babajyanye ntacyo babaha gishya ndetse ahubwo usanga bamwe babararura bakajya mu bitabubaka, ugasanga ari ukuduhira gusa, rimwe na rimwe ndetse ugasanga baravanga ibintu by’iyobokamana n’ibintu bimeze nk’ubupfumu byo gukiza bagendeye ku bubasha bagaragaza ntazi, ibyo rero birarura abantu rimwe na rimwe bakanababeshya.

".....Hari utudini tumeze dutyo tuzanwa n’abantu batanafite ubushobozi mu bumenyi batashoboye kwiga ngo banamenye iyobokamana. Kuyobora abantu bigomba ubushobozi, bigomba ubuhanga, hari rero ababikora badafite ubwo bushobozi n’ubwo buhanga ahubwo bagendeye mu bintu bya gushaka indonke, ugasanga rero barayobya abantu."

Yatanze urugero rw’amwe mu madini abwira abayoboke bayo ko badakwiye kujya kwa muganga bakababwira ko Imana ari yo ivura, kandi nyamara abo barwayi bikabagiraho ingaruka.

Aya madini ngo afatirana urubyiruko akarukura mu yandi madini rwari rurimo babashuka ngo babazaniye inkunga.

Ati:"Urubyiruko barufatirana n’ubukene kuko usanga hari amadini abona imfashanyo mu bantu ntazi, bagakoresha rero izo mfashanyo kugirango bararure urwo rubyiruko barujyane iwabo, ariko barugeza iwabo ugasanga ntacyo babahaye kibarera, ntacyo wabahaye kibafasha kubaka ejo habo hazaza, ugasanga bari mu mbyino, bari mu bintu biduhira gusa, mu miziki ariko uburere ugasanga ari buke cyane."

Yavuze ko Kiliziya Gatulika ikomeza kwigisha urubyiruko kutararurwa n’ayo madini y’inzaduka ariko akavuga ko bigoye kubibumbvisha kuko urubyiruko ari benshi kandi baba bashaka kugendana n’ibigezweho. Ati: "Hari ibyo urubyiruko rushaka twe tudakora, nk’ibyo by’imyidagaduro no gusenga bashyushya ibitaramo."

Icyakora avuga ko hari gushyirwaho uburyo bwo gufasha abakirisitu gatulika b’urubyiruko kubona uburyo bwo kwidagadura ariko bo ngo bakora ku buryo babikora badakurikiranye urusaku nk’urwumvikana mu bitaramo by’ayo madini yandi y’inzaduka.

Avuga ko hari gukorwa ibishoboka ngo urubyiruko rukurwe muri ibyo biguruka. Ati: "Turakora ibishoboka byose kugirango urubyiruko rudaheranwa n’ibyo biguruka ahubwo bakagira uburyo bategurwa kugirango ejo habo hazaza hashoboke."

Avuga ko Kiliziya ifite gahunda yo kwita ku burezi, kwita ku rubyiruko, no guteza imbere umuryango Nyarwanda kuko ngo iyo umuryango umeze neza n’abana bawurimo bamererwa neza, bagakura neza, bakiga, bakavuzwa ndetse bagakurana uburere bwiza mu gihe iyo umuryango utabanye neza bituma abana bawuvutsemo bahura n’ingaruka z’imibanire mibi y’ababyeyi babo.

Yakomeje agira ati: "Imana ishaka ko abantu bose baba beza, ishaka ko abantu bose bakira, bakava mu bibi bakajya mu byiza! Ibyo rero buri muntu abifitemo uruhare cyane cyane ingo."

Muri kiganiro Musenyeri Nzakamwita yagiranye na RBA dukesha iyi nkuru, yavuze ko hari ingo zirenga ibihumbi 15 Kiriziya Gatulika yitaho mu rwego rwo guteza imbere imibereho myiza y’izo ngo no kubafasha kubaka umuryango muzima wuje indangagaciro nzima.

Ku itariki ya 11 Nyakanga 2017 yijihije isabukuru y’imyaka 73 amaze avutse, n’imyaka 46 amaze ahawe ubusaseridoti ndetse n’imyaka 21 amaze ayobora Diyosezi ya Byumba.

IBITEKEREZO

Tanga igitekerezo


Kwamamaza Car Free Day/ 18/02/2018
INKURU ZAMAMAZA 10-08-2018

ITANGAZO RYA CYAMUNARA

Kwamamaza
Perezida KAGAME avuga ku manyanga mu Iyubakwa rya Hotel ya FERWAFA n’ikibazo cy’abana bo ku mihanda
KAGAME avuga kuri za Mission z’abayobozi zidasobanutse
IBYO ABANYAMAKURU BAVUGA KU IYEGURA RYA Fred MUVUNYI ku buyobozi bwa RMC
Uwari V/Perezida w’Urukiko rw’Urukiko rurinda Itegeko Nshinga/ Burundi
RUNIGA avuga uko bazinjira Congo
Ubutumwa bw’Umuturage kuri Perezida KAGAME
Kwamamaza