Kenya: Raila Odinga yahakanye ibyavuye mu matora avuga ko ari ibihimbano

Raila Odinga, umukandida wo ku ruhande rw’abatavuga rumwe na Leta mu matora y’umukuru w’igihugu muri Kenya, uhanganye cyane na Uhuru Kenyatta wari usanzwe ayobora Kenya yavuze ko atemera ibyavuye mu matora yemeza ko ibyo Komisiyo y’amatora yatangaje ari ibihimbano.

Kuri uyu wa 08 Kanama 2017, nibwo mu gihugu cya Kenya habaye amatora rusange arimo n’ay’umukuru w’igihugu. Aya matora yitabiriwe n’abakandida umunani ariko Raila Odinga na Uhuru Kenyatta ni bo bahanganye cyane muri aya matora.

Komisiyo y’amatora muri iki gihugu yatangaje ko iby’ibanze byavuye mu matora bigaragaza ko Uhuru Kenyatta ari we uri imbere n’ijanisha rya 55.6%, mu gihe Odinga afite ijanisha ry’amajwi rya 44.6% naho abandi bose bafite munsi y’ijwi rimwe ku ijana.

BBC yanditse ko ibi Raila Odinga yabihakanye yivuye inyuma avuga ko atabyemera, yavuze ko bitagaragaza amahitamo y’abanyagihugu ahubwo ko ari ibihimbano bya komisiyo y’amatora kandi agaragaza ko habayeho kwibwa amajwi.

Odinga aravuga ibi abishingiye ku kuba komisiyo itarerekanye amajwi yavuye ku masite y’itora ahubwo ikagaragaza ibyavuye mu matora ikoresheje uburyo bw’ikoranabuhanga. Ibyo musasobwa zagaragaje Odinga yabyise umusaruro w’ibyakozwe na Mudasobwa, bityo ngo ntabwo bihuye n’ugushaka kw’abaturage.

Odinga yagiye agaragaza impungenge zo kwibwa amajwi nyuma yuko mu bihe byo kwiyamamaza hagiye haba imfu za hato na hato ndetse n’iyicarubozo ku bamushyigikiye n’abayobozi b’amatora ndetse Chris Msando wari ushinzwe ibijyanye n’ikoranabuhanga muri komisiyo y’amatora na we yarapfuye muri iyo minsi.

Si ubwa mbere Odinga ahakanye ibyavuye mu matora kuko no muri 2007 yarabihakanye ndetse bibyara imvururu zaguyemo abasaga 1,100 abandi basaga 600,000 bakurwa mu byabo.

Muri 2013 na bwo uyu mukambwe w’imyaka 72 yahakanye ibyavuye mu matora ndetse yerekeza mu nkiko asaba kurenganurwa.

Kenyatta uhanganye cyane na Odinga akomoka mu bwoko bw’Aba Kikuyu bwiganje cyane muri Kenya akanakomoka kuri Jomo Kenyatta wabaye Perezida wa mbere wa Kenya ikimara kubona ubwigenge mu 1963.

Raila Odinga w’imyaka 72 we akomoka mu bwoko bw’aba Luo, na we akomoka mu muryango w’abanyepolitiki kuko ise yabaye Minisitiri w’Imbere wa mbere w’icyo gihugu.

Muri Miliyoni zisaga 48 z’abaturage batuye Kenya, abiyandikishije kuma lisiti y’itora basaga miliyoni 19. Mu gitondo cyo kuri uyu wa 09 Kanama, hari hamaze kubarurwa amajwi y’abatoye bagera kuri miliyoni 11.

Kugirango umuntu atsinde amatora y’umukuru w’igihugu muri aya matora asabwa kuba afite nibura amajwi angana cyangwa arenga 51% y’abatoye bose.

Muri aya matora kandi Abanya-Kenya baratora Abadepite, Abasenateri, Abaguverineri n’abahagarariye inzego z’ibanze.

Kenyatta na Visi Perezida we William Ruto bakurikiranweho n’urukiko mpuzamahanga Mpanabyaha ibyaha by’intambara n’ibyibasiye inyokomuntu byakozwe mu myaka icumi ishize.

Yisangize Inshuti.

Ibitekerezo

Tanga Igitekerezo