Nigeria: Umwiyahuzi yinjiye mu musigiti yiturikirizaho igisasu gihitana abantu 50

Muri Nigeria mu mujyi wa Adamawa, umwiyahuzi yiturikirijeho igisasu gihitana abagera kuri 50 ubwo yari mu musigiti yaje kwifatanya n’abandi basilamu mu masengesho ya mugitondo.

Police yo mu mujyi wa Adamawa yameje iby’uru rupfu rw’abantu 50 bahitanwe n’igisasu cy’umwiyahuzi wari waje mu musigiti afite gahunda yo guhitana imbaga y’abantu ubwo bari mu masengesho ya mugitondo.

Umwe mu babonye ubu bwiyahuzi buba, Abubakar Sule, yabwiye AFP dukesha iyi nkuru ko umwiyahuzi yari yivanze n’abaje gusengera mu gace ka Mubi kari mu mujyi wa Adamawa mu Majyaruguru ya Nigeria, mu masengesho ya mugitondo bityo ko bigoranye kuba wamenya uwo ari we.

Kuva muri iki gitondo ibi bibaye, nta mutwe n’umwe urigamba iby’ibi bikorwa by’ubwiyahuzi, gusa abarwanyi ba ISIS bamaze igihe bafite umugambi mubisha wo guhitana imbaga nyamwinshi mu Majyaruguru ya Nigeria nibo bakekwa.

Si ubwa mbere muri aka gace abantu baburira ubuzima mu bikorwa by’ubwiyahuzi kuko no mu Kuboza umwaka ushize abagera kuri 45 bahitanwe n’igisasu cyaturikijwe n’abagore babiri mu isoko ryo mu Majyaruguru y’iki gihugu.

Mu myaka umunani ishize abarwanyi ba Boko Haram bamaze guhitana abasaga ibihumbi 20, kandi bafite umugambi wo guhitana abatari bake nyuma y’aho igisirikare cy’iki gihugu kigaruriye tumwe mu duce twari indiri y’aba barwanyi mu majyaruguru y’iki gihugu.

Yisangize Inshuti.

Ibitekerezo

Tanga Igitekerezo