Papa Francis yatewe agahinda n’abapadiri bajyanwa mu Kiliziya no kwifata amafoto na videwo

Papa Francis yanenze cyane Abapadiri n’Abepisikopi badaha agaciro igihe cyo gutura igitambo cya misa, ugasanga bifatiye telefoni zigezweho (Smartphone) bari kwifatira amafoto n’amavidewo y’ibiri kubera mu rusengero aho gufasha abantu kwegeraza imitima ya bo Imana.

Papa Francis ubwo yari ku kibuga kitiriwe Mutagatifu Petero kiri i Roma, yabwiye abari bitabiriye misa asoma rimwe mu cyumweru ko biteye agahinda kubona abapadiri bakwiye kuyobora abakirisitu bafata umwanya wo gufata amafoto mu gihe cy’ijambo ry’Imana.

Papa yibukije Abapadiri n’Abepisikopi ko iyo bari mu misa imitima yabo igomba guhugukira iby’ijuru aho guhugira mu kwifotora nkuko AFP dukesha iyi nkuru ibitangaza.

Yagize ati: “Ni agahinda gakomeye kubona abakirisitu, Abapadiri ndetse tutaretse n’Abepisikopi bafata umwanya wo gutura igitambo cya Misa nk’igihe cyo kwishimisha aho usanga bayifashe nk’umunsi w’ibirori”

Papa Francis avuga ko biteye agahinda kubona abihaye Imana bari mu bantu bagaragara mu kiriziya mu gihe cya Misa bamanitse ama Telefone yabo bifotora aho kuzamura imitima yabo ngo bayishyikirize Imana.

Nubwo Papa Francis avuga ibi, yakunze kugaragara akoresha cyane Telefoni ndetse n’imbuga nkoranyambaga aho ari umwe mu bantu bakurikirwa cyane ku rubuga rwe rwa Twitter ndetse akaba akunze kugaragara yifotoza n’urubyiruko ariko akavuga ko mu gihe harimo gutambuka ijambo ry’Imana abantu bagomba guhugukira iby’Ijuru.

Alexis Bikorimana

Yisangize Inshuti.

Ibitekerezo

Tanga Igitekerezo