Inyungu ku nguzanyo mu mabanki ziracyari hejuru- Perezida KAGAME mu kwizihiza imyaka 50 ya BK

Ubwo ku mugoroba wo kuwa gatanu 05 Gicurasi 2017, Perezida wa Repuburika y’u Rwanda yifatanyaga n’abakiriya, abayobozi n’abakozi ba Banki ya Kigali mu kwizihiza isabukuru y’imyaka 50 imaze ishinzwe, umukuru w’igihugu yagaragaje ko inyungu zisabwa ku nguzanyo zakwa abafata imyenda mu mabanki zikiri hejuru.

Ni mu muhango wabereye muri Kigali Convention Center ahabereye igitaramo kidasanzwe cyasusurukijwe n’abahanzi batandukanye barimo Makanyaga Abdoul na Band ye, cyaranzwe n’ubutumwa butandukanye, aho umukuru w’igihugu yashimiye iyi banki ku musanzu watanze mu bukungu bw’igihugu n’urwego imaze kugeraho, ariko na none agaragaza ko muri urwego rw’amabanki hakirimo imbogamizi zo kuba amafaranga amabanki afite akiri hasi ugereranyije n’andi masoko, bigatuma habaho imbogamizi mu gutera inkunga imishinga minini igihugu kiba gitekereza.

Perezida Kagame yasabye abakikorera hamwe n’amabanki kureba uburyo inyungu ku nguzanyo zakoroha kuko usanga zikiri hejuru bityo bigatuma abafata izo nguzanyo batagera ku ntego uko babyifuza. “Igiciro cy’inguzanyo kiracyari hejuru cyane, bigatuma hataboneka inguzanyo z’igihe kirekire ku miryango no kwagura ibigo byacu. Dukeneye gukorera hamwe, Leta n’urwego rw’abikorera, kugira ngo inyungu ku nguzanyo z’amabanki zorohere abantu.”

Perezida Kagame ageza Ijambo ku mbaga yari yitabiriye ibi birori

Umuyobozi Mukuru wa Banki ya Kigali Madamu Diane Karusisi yavuze ko n’ubwo imyaka 50 hari urwego yishimira isize BK igezeho, yavuze ko mu myaka mirongo 50 itaha bifuza ko mu Rwanda haba hari Banki iri ku rwego mpuzamahanga ikomeye kandi ko bifuza ko yazaba ari Banki ya Kigali.

Umuyobozi w’Inama y’ubutegetsi ya Banki ya Kigali Marc Holtzman yashimiye Perezida Kagame ko ibyo Banki ya Kigali yagezeho yizihiza uyu munsi, ari isoko y’imiyoborere myiza n’ikirekerezo cya Perezida Kagame ndetse avuga ko biri mu byatumye ahitamo gufata ubwenegihugu bw’u Rwanda

Muri uyu muhango Perezida Kagame yashyikirijwe ikarita mpuzamahanga yo kubikurizaho aho ari hose ku isi (yatangijwe na BK) NK’umukiriya w’imena w’iyi banki.

Umuyobozi w’Inama y’ubutegetsi agaragaza ikarita yahawe bwa Perezida Paul Kagame nk’umukiriya w’imena

Banki ya Kigali ikaba ari imwe muri Banki z’ubukombe mu Rwanda zifite amashami menshi hirya no hino mu gihugu ikaba iza no muri Banki zifite abakiliya benshi nyuma ya Banki y’abaturage y’u Rwanda

Yisangize Inshuti.

Ibitekerezo

Tanga Igitekerezo