Iki kibuga cy’indege (cya Bugesera) ntabwo kizaba nka ya mabati- Perezida Kagame

5

Perezida Paul Kagame uherutse kongera gutorerwa kuyobora u Rwanda yashyize ibuye ry’ifatizo ahazubakwa ikibuga cy’indege cya Bugesera yizeza abanyarwanda ko kigomba kubakwa kikarangira byanze bikunze.

Kuri uyu wa gatatu tariki 09 Kanama nibwo umukuru w’igihugu Paul Kagame yashyize ibuye ry’ifatizo ahazubakwa ikibuga cy’indege mpuzamahanga cya Bugesera.

Perezida Kagame yavuze ko iki kibuga kizongera ubukungu mu Rwanda kandi gifite umwanya munini mu ntego z’u Rwanda.

Ati :”Ikibuga cy’indege cya Bugesera kizafasha mu kongera ubukungu bw’u Rwanda ndetse n’ubuhahirane mu karere duherereyemo. Ikibuga cya Kanombe gikomeje gutera imbere, ariko iki kibuga cya Bugesera gifite umwanya munini mu ntumbero dufite.”

Yavuze ko u Rwanda rutitaye kubuto bwarwo ahubwo ko ruzaharanira gutera imbere cyane anizeza ko iki kibuga kizubakwa byanze bikunze.

Ati :”U Rwanda rushobora kuba atari igihugu kinini, ariko tuzahora duharanira kuba beza bashoboka, bagera kuri byinshi. Iki kibuga cy’indege ntabwo kizaba ’nka ya mabati’. Iri buye ry’ifatiyo ni intangiriro y’ibikorwa.”

Yahise avuga ko mu mezi macyeya bizeye kuzagaruka gutaha iki kibuga kandi ko batazatenguha abanyarwanda ati:”Nizeyeko mu mezi make ari imbere tuzaba twagarutse hano gutaha no gutangiza ibikorwa by’iki kibuga cy’indege. Ndashaka kubwira abanyarwanda badutegerejeho byinshi ko muri uyu mushinga tutazabatenguha. Tuzakora neza nkuko bisanzwe.”

Perezida Kagame yavuze ko uyu mushinga wo kukaba iki kibuga cy’indege ari ingirakamaro ari na yo mpamvu yishimiye kuwushyiraho ibuye ry’ifatizo.

Yavuze ko ari umushinga watekerejwe igihe kirekire ari na yo mpamvu asaba ubufatanye bwa buri wese kugirango urangire iki kibuga gitangire gukoreshwa.

Yashimiye kandi abafatanyabikorwa bose bemeye gushyira icyizere kuri uyu mushinga ndetse anabizeza ko u Rwanda rutazabatenguha.

Yisangize Inshuti.

Ibitekerezo 5

Tanga Igitekerezo