Ese MEDIA HIGH COUNCIL ntiyaba ivomera mu gitobotse?

1


• Guhugura abanyamakuru batari ku kigero cyo guhugurwa
• Kongerera ubumenyi ibitangamakuru bitakiriho cyangwa by’ikitiriro
• Kudakora isuzuma ry’amahugurwa itanga kandi aba yatanzweho akayabo
• Guhugura bamwe muri buri cyiciro

Ku isi hose Itangazamakuru ni umwuga wihariye kuko ari umuyoboro ukomeye uhuza abaturage n’abayobozi, ryizerwa cyane na rubanda, rikaba indorerwamo y’ubuyobozi cyangwa ubutegetsi. Iyo rikozwe neza rirubaka cyangwa rigasenya iyo rikozwe nabi, kuko kenshi ibirinyuzwamo bifatwa nk’ukuri muri rubanda, ari yo mpamvu bivugwa ko itangazamakuru rifatwa nk’ubutegetsi bwa kane mu gihugu.

By’umwihariko itangazamakuru mu Rwanda rifite amateka yihariye kuko ari imwe mu ntwaro yifashijwe n’ubutegetsi mu gushyira mu bikorwa umugambi wa Jenoside yakorewe Abatutsi mu kubiba urwango, kuko ari wo muyoboro mugari ubutegetsi bwari bufite.

Ibi byatumye Leta y’u Rwanda nyuma ya Jenoside ishyira imbaraga mu kubaka ubushobozi bw’itangazamakuru ry’umwuga, ishyiraho inzego n’amategeko yihariye agamije gufasha no kurengera uyu mwuga byose byunganira Urwego rw’abanyamakuru bingenzura rwashyizweho muri 2013.

Inama y’igihugu y’Itangazamakuru (Media High Council) ni rumwe mu nzego Leta yashyizeho rufite mu nshingano zayo guteza imbere ubwisanzure bw’itangazamakuru guhugura abanyamakuru no kububakira ubushobozi. Mu buryo uru rwego rwifashisha harimo gukoresha amahugurwa atandukanye y’abanyamakuru, ndetse n’ibigo byaba ibya Leta n’ibyigenga bishaka gutanga ubumenyi ku banyamakuru usanga babinyuza muri Media High Council.

Nyamara n’ubwo usanga aya mahugurwa akorwa kenshi akanitabirwa n’abanyamakuru bahagarariye ibitangazamakuru baturuka mu bitangazamakuru birenga 150 bibarurwa mu Rwanda, wakwibaza niba umusaruro n’ubumenyi buyatangirwamo bugirira umusaruro ibitangazamakuru cyangwa abayitabira, ugereranyije n’imbaraga n’ubushobozi ayo mahugurwa aba yatwaye mu kuyategura.

Tugendeye ku ngero zifatika

Tugendeye ku ngero zifatika mu gihe cya mbere cy’umwaka wa 2017, dufatiye nibura mu kwezi kwa Werurwe n’intangiriro za Mata 2017, Iki kigo (Media High Council ) cyateguye ibyiciro bigera kuri bitatu by’amagururwa.

Muri rusange ikiba kigenderewe ni ukongera ubumenyi, bituma aya mahugurwa aba ateguye atwara amafranga atari make n’ibikoresho bitari bike. Urugero ni nk’aho icyiciro giheruka cy’amahugurwa cyatwaye amafranga agera kuri miliyoni 12,8. Ugenekereje nibura guhugura umunyamakuru umwe ku munsi yagendwagaho n’amafranga ari hagati y’ibihumbi 50 na 60.

Aha wahahera wibaza mu gihe Inama y’Igihugu y’Itangazamakuru ishyiriweho niba ubushobozi bw’ibitangamakuru bwiyongera, ese ngufu zishyirwa muri aya mahugurwa nibura hari icyo byungura ibitangazamakuru cyangwa abanyamakuru ubwabo?

Impamvu yo kwibaza ibi byose?

Bamwe mu banyamakuru twaganiriye basanga amahugurwa ubwayo aba ari meza kandi aba ari ingirirakamaro, ariko bakanenga uburyo akorwamo n’abayatumirwamo kuko kenshi usanga ahora yitabirwa n’abanyamakuru bamwe harimo n’abafite ibitangazamakuru bitagikora, baba baje bagamije ibindi bitari ukunguka ubumenyi ntibabubyaze umusaruro kuko hari n’aba batawurimo ariko banditse nk’abanyamakuru, yewe ndetse bibera mu bindi ariko amahugurwa yaza bakayitabira.

Hanengwa kuba Media High Council idakurikirana ngo irebe abo iha ubumenyi ni bande bafite bushobozi bwo kubyakira no kubibyaza umusaruro no kumenya niba atari abanyamakuru b’ibitangazamakuru bya baringa, bityo bagasanga bikomeje gutya byaba ari nko kuvomera mu gitobotse cyangwa umuhango wo kurangiza porogaramu baba barihaye.

Ku ruhande rwa banyir’ibitangazamakuru, benshi bakemanga umusaruro w’aya mahugururwa, aho basanga abanyamakuru bayitabira byabaye nk’umugenzo cyangwa nk’ibiraka bakuramo amafaranga yahawe izina rya Sukuma Week (tugenekereje amafranga abarenza icyumweru) nkuko bamwe babidutanarije.

Rene Anthere Rwanyage Umuyobozi w’igitangazamakuru Panorama mu kiganiro twagiranye, avuga ko aya mahugurwa ubundi yagombye kuba ari meza ku bitangazamakuru ariko usanga atagera ku ntego bitewe n’abanyamakuru bayitabira.

Ati “Hari abaza mu mahugurwa ku mpamvu ebyiri, haba hari abaje kunguka [..], ari ku rundi ruhande harimo nk’abantu batajya basiba amahugururwa, bakora amahugurwa ahoraho, ariko umusaruro bitanga ntushobora kuwubona, n’ubundi agasiga akiri wa wundi, imibereho ye nta gihinduka ukibaza n’igitangazamakuru akorera icyo byaba bikimariye, comentaire natanga ni uko Media High Council ikwiye kujya ikora amahugurwa ikanakora evaluation (kugenzura), ikareba icyo amahugurwwa yamaze”.

Anthere yibaza kenshi icyo Media High Council ishingiraho iyo umunyamakuru yitabira buri hugurwa kuko usanga hari abagize amahugurwa akazi, bahora bacunganwa nayo.

Umwe mu bagore bayobora kimwe bitangazamakuru gikorera kuri Interneti hano mu Rwanda (ntiyashatse ko amazina ye agaragazwa) yavuze ko kuri we abanyamakuru yagiye yohereza mu mahugurwa ntacyo abona byunguye igitangazamakuru cye.

Yagize ati ..Ku bwanjye abo noherezaga nta resultat nabonaga, njyewe ikibazo mbona ni uko objectif z’abanyamakuru ntabwo ari zo objectif za Media High Council, kuba twitwa abanyamakuru ntibivuze ko dufite intego zimwe, harimo abazamo bashaka amafranga, harimo abashaka icyubahiro.., hari abaza baje kuruhuka, urumva rero kugira ngo amahugurwa agire akamaro ntibikunda kuko ntiwavuga ngo ikibazo ni Media High Council

Ku ruhande rw’Inama y’Igihugu y’Itangazamakuru si uko babibona

Kuri Peacemaker Mbungiramihigo, Umunyamabanga Nshingwabirwa w’Inama y’Igihugu y’itangazamakuru yavuze ko nka Media High Council atari uko babibona kuko ngo bafite ubuhamya bwa ba nyir’ibitangazamakuru bivugira ko hari ibigenda bihinduka nk’uburyo bateguramo amakuru byahindutse (editorial meeting) ndetse no guhuza ubumenyi .

Peacemaker avuga ko ikindi abanyamakuru bungukiye mu mahugurwa yagiye ategurwa na Media High Council harimo gufasha abanyamakuru kugera ku nkuru mu bice bitandukanye by’igihugu, baba baragiye batabonera ubushobozi bwo kwigezayo.

Ku kibazo cy’umusaruro muke ukemangwa, Peacemaker avuga ko muri gahunda y’ibikorwa by’uyu mwaka bashyizemo gahunda yo gukora igenzura ry’ibyo amahugurwa ahabwa abanyamakuru abagezaho, bityo bitarenze muri Kamena 2017 iryo genzura rizaba ryakozwe, ndetse ngo kuri ubu hari gahunda yo guhuriza hamwe abanyamakuru mu byiciro kugira ngo basangire ubumenyi.

Kugeza ubu mu Rwanda Imibare iheruka y’Urwego rw’abanyamakuru bigenzura (RMC) igaragaza ko mu Rwanda habarurwa abanyamakuru 686 banditswe n’ubwo umubare munini ari utanditswe. Aba bose bakorera mu bitangazamakuru bikabakaba 150, harimo amateleviziyo asaga 14, amaradiyo agera kuri 32, ibinyamakuru bisohoka ku mpapuro 48, n’ibikorera kuri Interneti bisaga 50. Muri byo harimo ibyamaze gufunga n’ibindi bikora nka baringa. Ariko na none wakwibaza ese ibi ntibyaba ari nka bwa buro bwinshi butagira umusururu? Ni nde ukwiriye kubibazwa?

Yisangize Inshuti.

Ibitekerezo 1

Tanga Igitekerezo