Ubwongereza bwatumije ingano (dose) miliyoni 90 z’inkingo za COVID-19

Yanditswe na Mudage Charles , kuwa 10 ukwakira 2019

Leta y’Ubwongereza yasinye amasezerano yo kubona ingano (dose) miliyoni 90 z’inkingo za coronavirus.

Ni amasezerano yo kuzagezwaho izo nkingo ziri kugeragezwa na kompanyi ikora imiti yo mu Bubiligi yitwa Janssen hamwe na kompanyi ya Novavax yo muri Amerika, mu gihe basanga zikora neza.

Mu kiganiro n’abanyamakuru mu ijoro ry’ejo ku wa kane, umuyobozi w’ishami ry’umuryango w’abibumbye ryita ku buzima ku isi, OMS/WHO, yatangaje ko ibigo birenga 120 biri gushakisha urukingo rwa Covid-19.

Dr Tedros Ghebreyesus yavuze ko muri ubwo bushakashatsi hari abamaze kugera ku byiciro bishyira ku cya nyuma. OMS yemeje kandi ko iri kuvugana n’Uburusiya ngo hasuzumwe ubushobozi bw’urukingo iki gihugu cyavuze ko cyagezeho.

Amasezerano Ubwongereza bwasinye avuze ko ubu iki gihugu kimaze gutumiza inkingo esheshatu zikiri mu igerageza, bituma Ubwongereza buzaba bufite ’dose’ miliyoni 340 mu bubiko bwabwo.

Mu mibare yoroshye, Umwongereza wese azaba ashobora kubona ’dose’ eshanu z’urukingo. Kenshi mu gukingira umuntu aba akeneye ’dose’ ebyiri gusa.

Mu gihe inkingo nyinshi zigeragezwa zikunze kwanga, leta y’Ubwongereza ntiyafashe hamwe, mu cyizere ko nibura mu hatandukanye yatumije hari aho urukingo rwabo ruzemezwa ko rukora neza.

Igiciro iyi leta yishyuye ntabwo cyatangajwe.

Kate Bingham ukuriye itsinda rya leta y’Ubwongereza rishinzwe inkingo, yabwiye BBC ati, "Ntabwo tuzi niba hari uruzemezwa ko rukora muri izi nkingo twatumije".

Avuga ko icy’ingenzi ari ugukora ku buryo Ubwongereza buzagira urukingo ruhagije ku bantu cyane cyane "bageramiwe no kwandura coronavirus".

Inzobere mu buzima zivuga ko gusaranganya urukingo - niruboneka - ku batuye isi bose bishobora kugorana kuko ibihugu bikize byatangiye kuvugana na kompanyi ziri hafi kugera ku rukingo, ngo niruboneka bizahite bibona uruhagije.

Seth Berkley, ukuriye ishyirahamwe mpuzamahanga ry’inkingo Gavi -avuga ko imwe mu mbogamizi ikomeye afite ari ibihugu bishyize imbere inyungu zabyo cyane ku rukingo.

Alok Sharma, umunyamabanga wa leta y’Ubwongereza ushinzwe ubucuruzi, yagize ati, "Amasezerano y’uyu munsi (ejo ku wa kane) ntabwo azungura Ubwongereza gusa ahubwo azatuma urukingo rusaranganywa mu buryo bukwiriye n’ahandi ku isi, kugira ngo rurengera miliyoni z’abantu".

Leta y’Ubwongereza imaze gutumiza inkingo ziri mu igerageza zakozwe mu buryo butandukanye:

’Dose’ miliyoni 100 z’inkingo za Adenovirus za Kaminuza ya Oxford
’Dose’ miliyoni 30 z’urukingo rwa AstraZeneca rwa Janssen
’Dose’ miliyoni 30 z’urukingo rwa mRNA rwa BioNTech/Pfizer
’Dose’ miliyoni 60 z’urukingo rwa Valneva
’Dose’ miliyoni 60 z’urukingo rwa proteine rw’ikigo GSK/Sanofi
Na ’dose’ miliyoni 60 z’urukingo narwo rwa proteine rw’ikigo Novavax.

Birashoboka ko amakuru yemeza niba muri izi nkingo - nyinshi ziri mu igeregeza rya nyuma ku bantu - harimo izikora neza, azamenyekana nyuma y’iyi mpeshyi, ariko nta cyemezo ntakuka cyabyo.

Leta y’Ubwongereza ivuga ko igerageza ry’inkingo za Janssen na Novavax riri kugenda neza, ko icyiciro cya mbere cya ’dose’ batumije gishobora kubageraho hagati mu 2021.

Kugeza ubu mu Bwongereza abamaze gutangazwa ko banduye Covid-19 barenga 315,000, muri bo abarenga 46,000 yarabishe, nkuko imibare ya Kaminuza ya Johns Hopkins yo muri Amerika ibigaragaza.

Amakuru mashya

South Korea’s Moon Jae-in sworn in vowing address

2 hours ago 126

South Korea’s Moon Jae-in sworn in vowing address

2 hours ago 126

South Korea’s Moon Jae-in sworn in vowing address

2 hours ago 126

South Korea’s Moon Jae-in sworn in vowing address

2 hours ago 126