Perezida w’ishyaka riharanira Demokarasi no kurengera ibidukikije DGPR Dr Frank Habineza yatangaje ko adacitse intege nyuma yo gutsindwa amatora y’umukuru w’igihugu ubugira kabiri. Aca amarenga ko no mu 2029 azongera kwiyamamaza.
Mu kiganiro Frank Habineza yahaye ibinyamakuru bya Leta yavuze ko ashima uko amatora yagenze. Agenera ubutumwa bw’ishimwe Perezida Kagame wamutsinze muri aya matora, anashimira abanyarwanda bongeye gutora ishyaka rya Green Party rikaba ryabonye imyanya mu nteko ishingamategeko.
Dr Frank Habineza utsinzwe amatora ubugira kabiri ariko yemeza ko agiye gutegura amatora y’ubutaha. Ati “Ubu tugiye kwitegura amatora y’ubutaha. Ibi bintu ntitubirimo mu mikino, turi kubaka igihugu kandi kubaka Igihugu ni ugukomeza. Banyitege mu matora ya 2029.’
Habineza Frank yavuze ko amatora ya 2024 yari ateguye neza agereranije n’ayo mu 2017. Avuga ko yakiriwe neza mu turere twose yagezemo yiyamamaza ndetse ko abanyarwanda bamaze kugirira icyizere ishyaka rye.
Frank Habineza amajwi y’ibanze yerekena ko yagize amajwi 0.33% mu gihe ishyaka ayoboye rya Green Party ryo ryagize amajwi 5.30% mu majwi y’ibanze y’abagize inteko ishingamategeko.
