Joro ryiza nshuti y’abanebwe ngwino dore uje ukenewe cyane ngo abanebwe biyegeke ku gasego, abagore bapfumbate abagabo babo n’abazamu dukanure amaso ubutitsa, imbwa
n’ibisambo babone akanya, abahehesi n’abacuraguzi babyungukiremo, n’abanyerondo
babone akabo.
Joro ryiza nshuti y’abanebwe singushakaho aka
munani, ahubwo ngwino uhahindure umukara, abasinzi babone uko basinda n’indaya zibone uko ziraya, n’ubwo ibyo byose binukira
uwaduhanze, reka nicecekere abaforoderi
batanyumva bakandyoza kumena ibanga ry’akazi.
Joro ryiza nshuti y’abanebwe nsigaye nkugaya ubugufi bwawe, menya waribwe amasaha
ntubimenye, kuko uko ndyamye uhita unkwepa
ngashyigukira hejuru izuba ryaka ngahanaguza
amacandwe ingonera kuko koga mba
ntakibishoboye kubamasaha ya boss mba namwibye.
Joro ryiza nshuti y’abanebwe ngwino uzane akabeho nende akarago ntore agatotsi nirotere sheri wanjye nabo nkunda barote ababo, ndote imali, ndote imana, ndote ndwana ndote ndwara, ariko burya koko joro ugira ayawe uziko
njya ndota nanapfuye!
Joro ryiza nshuti y’abanebwe kana keza
nyiribironda, uziko iyo uje ariho ninjiza imali
iwanjye muri loji, muri bar se ho biba bimeze
bite? reka mukabyiniro ho sinakubwira ibiceri
biba byivanze n’ibicece, abagarura ayo bashaka
n’abaheza tukabona akanya.
Joro ryiza nshuti y’abanebwe reka twe abamotari waradukanze, isafari zakure ntituzigenda hato batatwitegera ikamba cg abodutwaye
bakaduhonda, ndayiparika nkaryama njye mwene Cyuma nibashaka bazanyite umunebwe ntawuntunze, kandi nzarya duke ndyame kare.
Joro ryiza nshuti y’abanebwe rekandekere aha
ntaza gusarara, gusa twe abanebwe
turagushima, turakurata turagusenga yewe ndetse turagusingiza turagushimira ibibi byawe byinshi, turagushimira n’ibyiza byawe bike,
turagushimira ko uri indiri y’ibibi, ugendwa
n’imbwa, ibihunyira, indaya, ibisambo,abanyerondo, abasirikare n’abarozi.
Joro ryiza nshuti y’abanebwe, ese ujya
umenyako ibinyendaro byinshi tubikesha wowe, twakunganyiki se nyakuvunumuheto, ko uwo twabuze kumanywa tumubona nijoro, uri nyamwongera bibi, uri inshuti y’abanebwe ariko natwe abanyamurava turagushima ni uko tujya tugutesha agaciro tukagucamo kabiri twiha kuryama dukerewe cg tubyuka kare, njyewe mbaye ngusezeranije ko ntazabyongera uziha
kuguhemukira azicwe na sirimenaje (sur menage).
Ngayo nguko!
