Abagize inteko ishingamategeko umutwe w’abadepite nyuma yo kurahirira inshingano batoye komite nyobozi. Kazarwa Gertrude atorerwa kuba umuyobozi w’intekp ishingamategeko umutwe w’abadepite umwanya asimbuye ho Mukabalisa Donatille.
Aba bombi bakomoka mu ishyaka rya PL, biteganwa n’itegekonshinga mu ngingo yaryo ya 118 ko Perezida w’umutwe w’abadepite adashobora kuva mu mutwe wa Politiki umwe na Perezida wa Repubulika.
Kazarwa Gertrude yari asanzwe Ari umudepite ariko yabaye umudepite avuye muri Sena. Tariki 29/08/2014 Madame KAZARWA Gertrude yatorewe kuba Umusenateri , mu matora yo gusimbura yabereye mu Ntara y’Iburasirazuba, yari yiyamamarije mu karere ka Gatsibo.
Yabaye umusenateri asimbuye Madame Mukabalisa Donatille wahoze muri uwo mwanya akawuvamo ajya kuba Umudepite. Uyu munsi Kazarwa yongeye gusimbura Hon Mukabalisa Donatille wahoze ku buyobozi bw’umutwe w’abadepite.
Kazarwa Gertrude wagize amajwi 73 mu badepite 80 batowe, afite imyaka 60 y’amavuko. Azungirizwa na Mussa Fazil Harerimana nka Visi Perezida ushinzwe ubuyobozi n’imari ndetse na Uwineza Beline nka Visi Perezida ushinzwe amategeko no kugenzura ibikorwa bya Guverinoma.
