Komisiyo y’Igihugu y’Amatora, yatangaje iby’agateganyo byavuye mu matora y ‘ abasenateri 12 batorwa n’inzego zihariye hakurikijwe inzego z’imitegekere y’Igihugu mu Ntara n’Umujyi wa Kigali. Uretse batatu bashya, 9 muri aba 12 batowe bari basanzwe muri Sena.
Mu mujyi wa Kigali hari hakeneye gutorwa umusenateri umwe yabaye Nyirasafari Esperance wari usanzwe ari na Visi Perezida wa Sena.
Mu ntara y’amajyaruguru hagombaga gutorwa abasenateri 2. Amajwi y’agateganyo arerekana ko hatowe Nyinawamwiza Letitia na Rugira Amandin.
Mu ntara y’amajyepfo hagombaga gutorwa abasenateri batatu. Amajwi y’agateganyo arerekana ko hatowe Umuhire Adrie, Uwera Pelagie na Cyitatire Sosthene.
Mu ntara y’i Burasirazuba naho hagombaga gutorwa amasenateri batatu. Aha hatowe Bideri John Bonds, Mukabaramba Alivera na Nsengiyumva Frugence.
Mu ntara y’i Burengerazuba naho hagombaga gutorwa abasenateri batatu. Amajwi y’agateganyo arerekana ko hatowe Mureshyankwano Marie Rose, Havugimana Emmanuel na Niyomugabo Cyprien.
Komisiyo y’igihugu y’amatora ivuga ko mu gihe kitarenze amasaha 48 hatangajwe Aya majwi y’agateganyo itangaza amajwi ya burundu. Ugendeye ku bigaragara mu majwi y’agateganyo n’imibare y’abagiye batora usanga nta mpinduka zitezwe kuza kuba ku rutonde rw’abasenateri batsinze amatora.
Kuwa 17 Nzeri haratorwa abasenateri babiri bahagarariye amashuri makuru na Kaminuza bya Leta n’ibyigenga. Aba batorwa n’abashakashatsi ndetse n’abarimu ba Kaminuza bahoraho.
