Abakobwa barenga mirongo 60 mu bari barashimuswe n’umutwe wa Boko Haram baratorotse bagaruka iwabo mu ijoro ryo kuri uyu wa gatanu ubwo abarwanyi b’uwo mutwe bari bagiye kurwana n’ingabo za Leta mu gace ka Bamboa.
Bamwe mu batorotse
Umwe mu bayobozi bo muri Leta ya Borno witwa Gava Abbas yavuze ko na we yabibwiwe n’inshuti ye ko hari abakobwa barenga 63 batorotse Boko Haram mu gihe abarwanyi bari bahanganye n’ingabo za Leta mu ijoro ryo kuwa gatanu rishyira kuwa gatandatu.
Gava yakomeje agira ati : “Ntabwo turabona imibare nyayo, ariko twizera ko Imana yabahaye uburyo bwo guhunga igihe abarwanyi benshi bari bahugiye mu bitero by’ingabo za Leta aho abasirikari 12, abapolisi 5 , inyeshyamba zirenga 50 n’abaturage tutaramenya umubare bapfuye.”
Aha bari barinzwe n’inyeshyamba za Boko Haram
Hari n’undi umwe mu bashinzwe umutekano wemeje ayo makuru , avuga ko abo bakobwa batorotse ubwo zimwe mu nyeshyamba zari zagiye kurwana zigasiga bake barinze abo bakobwa, ariko ngo inyeshyamba zari zasigaye zibarinze zari zasinze kuburyo byoroheye abo bana kunyonyomba gahoro gahoro ariko babikora vuba.
Abaturage ubwo bari mu myigaragambyo ngo abo bakobwa barekurwe
Bimwe mu bibeshejeho Boko Haram ni ugushimuta, mu kwezi kwa kane nibwo abakobwa 300 bashimuswe babakuye ku ishuri Chipok muri Leta ya Borno.Abakobwa bagera kuri 220 baracyari mu maboko ya Boko Haram.Gusa nta kinyamakuru kirabona uko kivugana n’abo bakobwa batorotse.
Michelle Obama yasabye Boko Haram kurekura abo bakobwa
Abantu benshi bamaganiye kure iryo shimutwa ndetse na bamwe mu bantu bazwi nka Madamu wa Perezida Obama Michelle yasabye ko abo bakobwa barekurwa.
The Independent
