Amakuru aturuka muri Leta zunze ubumwe za Amerika aremeza ko abakomeye mu ishyaka ry’abademokarate riri ku butegetsi bakomeje gusaba Perezida Joe Biden guhagarika kwiyamamaza.
Muri Leta zunze ubumwe za Amerika amatora y’umukuru w’igihugu ateganijwe mu Ugushyingo uyu mwaka. Perezida Biden ni umukandida w’abademokarate uzahatana na Donard Trump umukandida w’ishyaka ry’aba Repubulikani.
Mu kiganiro Biden yagiranye kuri telefoni na Hakeem Jeffries umwe mu bayoboye ishyaka ry’abademokarate ndetse cyarimo n’abandi bakomeye muri iri shyaka bagaragaje ko Biden Atari umukandida ukwiriye guserukira iri shyaka.
Abanenga Biden bagashingira ku ntege nke z’umubiri. Izi ntege nke za Perezida Biden w’imyaka 81 zagaragaye cyane mu kiganiro mpaka aherutse kugirana na Trump kuri Televisiyo ya CNN. Abagikurikiye bakemeza ko tari ameze neza ku rwego rwo kuba yakomeza kuyobora Leta zunze ubumwe za Amerika.
N’ubwo aba bayobozi mu ishyaka ry’abademokarate bagaragaza ko Biden akwiriye kwikura muri aya matora ariko kugeza ubu nta rindi zina bari bagaragaza ko ryamusimbura kuri kandidatire y’ishyaka ry’abademokarate.
