Muri Kamena uyu mwaka nibwo Minisiteri y’uburezi yatangije ubukangurambaga bwiswe Dusangire Lunch. Mu gihe cy’amezi 2 yonyine ubu bukangurambaga butangiye iyi Minisiteri yagaragaje ko abanyarwanda ndetse n’inshuti z’u Rwanda ziyemeje gutanga 222,413,550 Frw.
Muri Aya mafaranga yiyemejwe kandi ngo 30,163,550 Frw yamaze gutangwa. Mu butumwa MINEDUC yatangaje ishimira abitabiriye ubu bukangurambaga yagize ati ” Nimureke dukomeze ubufatanye twubake u Rwanda twifuza”.
Iyi gahunda ya Dusangire Lunch Kandi ni yo nsanganyamatsiko y’umunsi w’umuganura ukomeje kwizihizwa n’abanyarwanda ku isi yose muri uku kwezi kwa Kanama. Aba nabo bakaba ngo bakomeje kwegeranya ubushobozi bwo gushyigikira iyi gahunda yo kugaburira abana ku mashuri.
MINEDUC igaragaza ko abana bagaburirwa ku ishuri ku manywa bose bagera kuri 3,918,579. Bahoze ari 639,627 mbere y’uko bongeraho abo mu mashuri abanza.
Gutera inkunga iyi gahunda ni ugukanda *182*3*10*3# hanyuma ugakurikiza amabwiriza amafaranga akava kuri konti yawe ya mobile money.
