Minisitiri w’ubuzima Dr Sabin Nsanzimana yatangaje ko abaganga 6 bamaze guhitanwa n’indwara y’umuriro mwinshi uterwa na Virusi ya Marburg. Iyi ndwara kandi ngo abandi bantu 20 barayirwaye bari kwitabwaho.
Kuwa 27 Nzeri nibwo Minisiteri y’ubuzima yasohoye itangazo rigenewe abanyarwanda bose ribasaba kwitwararika no kwihutira kugera kwa muganga mu gihe bagaragaza ibimenyetso by’icyi ndwara. Minisitiri w’ubuzima Dr Sabin Nsanzimana yatangaje ko abantu 6 bamaze guhitanwa n’iyi ndwara biganjemo abaganga bakora ahavurirwa indembe.
MINISANTE ivuga ikomeje gufatanya n’izindi nzego mu gushakisha abahuye n’aba barwayi ndetse n’abahuye n’abitabye Imana ngo basuzuwe nabo.
Iyi virusi inzego z’ubuzima zivuga ko yandurira mu gukora ku maraso cyangwa se andi matembabuzi y’uwayirwaye. Yakwandurira kandi mu gusangira ibikoresho n’imyambaro byakoreshejwe n’urwaye iyi ndwara.
Bitandukanye n’ibyorezo byari bimaze iminsi nk’ubushita na COVID 19, iyi yo ni indwara igira ubukana bwinshi kuburyo umubare munini w’abayanduye ibahitana. Ishobora Kandi kumara hagati y’iminsi 3 na 21 itaragaraza ibimenyetso. Nyamara ariko ntiyandurira mu mwuka.
MINISANTE ivuga ko iri gukora ibishoboka byose ngo hapimwe abantu benshi hirindwa ko hagira undi guhitanwa n’iyi ndwara. Hatarebwa ibimenyetso birimo umuriro mwinshi, kubabara umutwe, kuruka no Gucibwamo.
Abahuye n’abanduye iyi ndwara ubu bari kwitabwaho n’abaganga harebwa niba batagaragaza ibimenyetso hagira ubigaragaza agahabwa ubuvuzi bwihuse.
Minisitiri Sabin yavuze ko kugeza ubu abanyarwanda basabwa kudakuka umutima no kubahiriza amabwiriza n’ingamba zitangwa. By’umwihariko bakirinda gutizanya ibikoresho n’umuntu ufite ibimenyetso by’iyi Virusi. Bagakaraba intoki n’isabune kenshi gashoboka ndetse Aho bishoboka bagakoresha imiti yica udukoko izwi nka “Hand Sanitizer”.
Iyi ndwara imaze kumvikana mu bihugu birenga 15 byo ku mugabane wa Afurika.
