Umunyapolitiki akaba n’umuherwe, Moïse Katumbi, uherutse gutsindwa amatora y’umukuru w’igihugu muri Repubulika Iharanira Demokarasi ya Congo (RDC), yongeye kwikoma Perezida Tshisekedi amushinja kumubuza kwerekeza muri Côte d’Ivoire mu gusoza imikino ya CAN 2023.
Katumbi yabyanditse kuri X (yahoze ari Twitter), kuri uyu wa Kane avuga ko indege ye yabujijwe gufata ikirere.
Katumbi wakurikiye Felix Tshisekedi mu majwi y’amatora y’umukuru w’igihugu yabaye mu mpera z’umwaka ushize, akagira amajwi 15%, mu gihe Tshisekedi yagize 73%, ni umwe mu bakunze kugaragaza ko RDC iyobojwe igitugu.
Si ubwa mbere, Moïse Katumbi abujijwe kwerecyeza hanze, kuko no mu kwezi k’Ukuboza 2022, na bwo indege ye yagombaga kujya kumufata imwerecyeza muri Qatar kureba umukino wa nyuma w’igikombe cy’Isi, yabujijwe kujyayo.
