U Rwanda rwinjije miliyari 1.1 z’amadolari aturutse mu mabuye y’agaciro rwacuruje mu 2023, akaba ari ubwa mbere mu mateka yarwo rwinjije aka kayabo kuko umwaka ushize rwari rwinjije miliyoni 772 z’amadolari nk’uko byatangajwe n’ikigo gishinzwe Mine, Peteroli na Gaz (RMB).
Iyi ntambwe yatewe iragana mu cyerekezo n’intego ya guverinoma yo kwinjiza miliyari 1.5 ku mwaka mu gucuruza amabuye y’agaciro nibura mu 2024. Ubwiyongere bw’akayabo gaturuka mu mabuye y’agaciro bwatewe no kuyongerera agaciro, ubunyamwuga mu bucukuzi, ishoramari ryashowe mu gukoresha imashini n’ikoranabuhanga mu bucukuzi.
Umusaruro w’umwaka wagizwemo uruhare cyane n’ibyo u Rwanda rwinjije mu gihembwe cya nyuma cya 2023 [Ukwakira-Ukuboza], bingana na miliyoni $252.99 akaba ari inyongera ya 34.9 ku ijana ugereranyije n’igihembwe nk’iki cya 2022.
Zahabu yacurujwe yagize uruhare runini cyane kuko mu Ukwakira hoherejwe ingana n’ibilo 1015 byinjiza miliyoni 62.1 z’amadolari, mu Ugushyingo ni ibilo 823 byinjije miliyoni $52.9 naho mu Ukuboza ni ibilo 1,320 byinjije miliyoni $87.5.
