Barack Obama wahoze ayobora Leta zunze ubumwe za Amerika na Madame we Michelle Obama nabo bavuye ku izima batangaza ko ubu bari inyuma ya Visi Perezida Kamala Harris kuba yakwiyamamariza kuba umukuru w’igihugu ahagarariye ishyaka ry’abademokarate.
Visi Perezida Kamala Harris yatangiye kwiyamamaza imbere mu ishyaka ry’abademokarate ngo azemezwe n’inteko rusange izaba mu kwezi kwa munani gusa bivugwa hari abarenga 100 bakomeye muri iri shyaka batamushyigikiye. Bifuzaga ko haba ho amatora afunguye kuri buri wese maze Kamala yayatsinda akabona gutangwa nk’umukandida.
Obama yari umwe mu bagize igice kitemera ko Kamala yahita aba umukandida nta matora abayeho gusa yaje guhindura imvugo mu kiganiro yagiranye na Perezida Biden kuri telefone agaragaza ko nawe abona ubushobozi muri Visi Perezida Kamala Harris. Muri icyi kiganiro Kandi Obama yashimagije imyitwarire ya Perezida Joe Biden muri ibi bihe.
Kamala Harris aragenda yigarurira imitima ya benshi mu bagize ishyaka ry’abademokarate bagomba kumwemeza nk’umukandida.
Kuri Donald Trump wamaze kwemezwa n’ishyaka ry’aba Repubulikani we asanga Kamala Harris adashoboye ndetse kuri Trump ngo Harris ntanashobotse. Trump yanyuze ku rubuga rwe rwa Truth avuga ko ataniteguye kugirana ikiganiro mpaka na Kamala Harris igihe cyose azaba ataremezwa burundu n’ishyaka rye.
Amatora yo muri Leta zunze ubumwe za Amerika azaba mu Ugushyingo 2024.
