Komisiyo y’igihugu y’amatora yatangaje ibyavuye mu matora bya burundu bigaragaza ko Perezida Kagame yatsinze amatora y’umukuru w’igihugu ku majwi 98.18% naho ishyaka rya FPR Inkotanyi rigatsindira ubwiganze mu nteko ishingamategeko ku majwi 68.8%.
Ni amajwi adatandukanye na busa n’ibyari byatangajwe nk’amajwi y’agateganyo mu cyumweru gishize. Komisiyo y’igihugu y’amatora yashimiye abanyarwanda muri rusange bitabiriye amatora. Hagombaga gutora abanyarwanda 9,071,157, hatoye abagera kuri 8,907,876 muri aba kandi 99.86% ngo batoye neza.
Komisiyo y’igihugu y’amatora kandi yashimiye imitwe ya Politiki ndetse n’abakandida bigenga ku myitwarire yabaranze. Yashimiye abakorerabushake b’amatora ndetse n’abatanyabikorwa barimo inzego z’ibanze n’iz’umutekano.
Byari biteganijwe ko ibyavuye mu matora bya burundu bitangazwa bitarenze kuwa 27 Nyakanga. Ubu hakurikiye ho gutegura umuhango wo kurahira kw’abatsinze amatora. Itegekonshinga riteganya ko bikorwa mu minsi itarenze 15 hatangajwe ibyavuye mu matora bya burundu.
Ibyavuye mu matora yo ku 14-16 Nyakanga bya burundu
