Komisiyo y’igihugu y’amatora yatangaje ibyavuye mu ibarura ry’amajwi by’agateganyo. Amajwi nyuma yo kubarura abagiye bose arerekana ko Perezida Kagame yagize 99.18% naho mu matora y’abadepite FPR Inkotanyi yagize 68.83%.
Amajwi yatangajwe ku munsi nyirizina w’amatora afatwa nk’icyerekezo cy’amajwi yagaragazaga ko Perezida Kagame yari yatsindiye ku majwi 99.15% mu gihe FPR Inkotanyi yari yatsinze amatora y’abadepite ku majwi 62.67%.
Ku bandi bakandida Perezida Dr Frank Habineza wa Green Party by’agateganyo yagize amajwi 0.50 avuye kuri 0.33% mu gihe Mpayimana Philipe umukandida wigenga yagize amajwi 0.32% avuye kuri 0.26%.
Mu matora y’abadepite amashyaka yandi amajwi yayo yagabanutse. PL yavuye ku majwi 10.97% igira 8.66%.
Ishyaka rya PSD ryari ryabanje gutangazwa ko ryari rifite 9.48%, nyuma y’ibarura ry’ibanze amajwi yagabanutse aba 8.62%.
Ishyaka rya PDI ryavuye kuri 5.81% rigira 4.61.
Green Party yavuye kuri 5.30% igira 4.56%.
PS Imberakuri yari yagize 5.26% nayo yamanutse igira 4.51%.
Ibi byavuye mu matora by’agateganyo bisobanuye ko imitwe ya Politiki ya PDI,Green Party na PS Imberakuri itabashije kugira amajwi 5% ayihesha intebe mu nteko ishingamategeko umutwe w’abadepite.
Biteganijwe ko Komisiyo y’igihugu y’amatora izatangaza ibyavuye mu matora bya burundu taliki 27 Nyakanga 2024.
