Umukandida w’ishyaka ry’aba Repubulikani Donald Trump yaraye arusimbutse ubwo yiyamamazaga muri Leta ya Pennsylvania.
Amashusho yakwirakwiye ku mbuga nkoranyambaga agaragaza Trump wavugaga ijambo yifata ku gutwi hanyuma agahita aca bugufi abarinzi be bagahita baza kumutabara. Nyuma hagaragaye amafoto Trump azamura igipfunsi agaragaza ikimenyetso cyo gutsinda ariko Kandi afite amaraso hafi y’ugutwi.
FBI yatangaje ko uwagerageje guhitana Trump yitwa Thomas Matthew ndetse hari amakuru avuga ko uyu nawe yahise ahasiga ubuzima. Isasu ryahushije Trump ryahitanye umwe mu bari bitabiriye ibikorwa bye byo kwiyamamaza abandi 2 barahakomerekera. Umuvugizi wa Trump yatangaje ko isasu ryanyuze ku gace gato k’ugutwi kwe kw’i buryo gusa ngo ntacyo yabaye.
Trump yahise ajyanwa mu rugo iwe. FBI yatangaje ko ikiri gukurikirana ababiri inyuma. Trump arahabwa amahirwe yo kongera kuyobora Leta zunze ubumwe za Amerika mu matora azahatana mo na Joe Biden watanzwe n’ishyaka ry’abademokarate mu kwezi k’ugushyingo.
