Komisiyo y’igihugu y’amatora nyuma yo kubarura 96.60% by’imibare y’abagombaga gutora abadepite yatangaje amajwi y’ibanze. Mu mibare igaragara kugeza ubu uku niko imyanya yagabanwa n’imitwe ya Politiki mu nteko ishingamategeko umutwe w’abadepite.
Niba Umuryango FPR Inkotanyi n’indi mitwe ya politiki bafatanyije, PDC, PPC, PSR, PSP na UDPR, bagize amajwi menshi mu matora bakaba begukanye 62,67%. Bivuze ko mu myanya 53 baba bafitemo imyanya 33.
Niba ishyaka PL amajwi 10.97% bivuze ko mu myanya 53 ry’aba rigomba kugira mo abadepite 6. Iri ryari risanzwe rifite abadepite 4 mu nteko icyuye igihe.
Ishyaka PSD ryagize amajwi 9.48% byaba bivuze ko ryatsindiye abadepite 5. Aba nibo n’ubundi PSD yari isanzwe ifite mu nteko.
Ishyaka rya PDI ryagize amajwi 5.81% ry’aba rigomba kugira abadepite 3 mu myanya 53 y’abadepite batorerwa mu mitwe ya Politiki.
Ishyaka rya Green Party ryagize amajwi 5.30% ryaba ryatsindiye imyanya 3 mu nteko ishingamategeko umutwe w’abadepite. Ni imyanya yaba yiyongereyeho umwe kuko ryari risanganwe abadepite 2.
PS Imberakuri yagize amajwi 5.26 nayo Yaba yatsindiye imyanya 3 mu nteko ishingamategeko umutwe w’abadepite. Ikaba yiyongereye ho umwanya umwe kuko yari isanganwe abadepite 2 mu nteko ishingamategeko yacyuye igihe.
Inteko ishingamategeko umutwe w’abadepite ugirwa n’abadepite 80. Uretse aba 53 batorwa mu matora rusange bwiyongera ho 24 bahagarariye 30% by’abagore, 2 bahagarariye urubyiruko n’umwe uhagarariye abafite ubumuga.
Tubibutse ko amajwi y’agateganyo azatangazwa kuwa 20 Nyakanga mu gihe amajwi ya burundu azatangazwa kuwa 27 Nyakanga 2024.
