Hatagize igihinduka ku miterere y’urutonde rw’abadepite batanzwe n’imitwe ya Politiki, bwa mbere umubare w’abagore mu nteko ishingamategeko y’u Rwanda umutwe w’abadepite wagera kuri 65%.
Iyi mibare ishingira ku giteranyo cy’abadepite b’abagore bashobora kwisanga mu nteko ishingamategeko bangana na 52 mu badepite 80. Tugendeye Ku miterere y’urutonde rw’abakandida Depite batanzwe n’imitwe ya Politiki ndetse n’imyanya amashyaka yagiye atsindira, dusanga mu nteko hashobora kwinjiramo abagore 26. Aba bakwiyongeraho 24 batowe bahagarariye abagore bakaba 50. Aba nabo bakiyongeraho 1 watowe mu rubyiruko na 1 watowe uhagarariye abafite ubumuga. Bakaba abadepite 52 b’abagore muri 80; bangana na 65%.
Abagabo mu nteko ishingamategeko baba ari 28 bingana na 35%. Bisobanuye ko ahabonetse umugabo umwe hazajya hagaragara abagore nibura 1.8, hafi babiri. Ubwo ahari abagabo 10 hazajya hagaragara abagore 18.
Inteko ishingamategeko y’u Rwanda umutwe w’abadepite ni imwe mu zisanzwe zigira ubwiganze bw’abagore ku isi. Gusa uyu mubare waba uciye agahigo. Umubare wegera uyu waherukaga nyuma y’amatora ya 2013. Icyo gihe inteko ishingamategeko yari igizwe na abadepite b’abagore 63.75%.
Inteko ishingamategeko umutwe w’abadepite muri manda ishize warimo abagore ku gipimo cya 61.25%.
