Shampiyona y’Umupira w’amaguru mu Rwanda irasubukurwa kuri uyu wa gatanu tariki 12 Mutarama 2024, aho imikino yo kwishyura itangira hagaragamo umukino w’ikirarane.
Ni umunsi wa 16 wa Shampiyona aho ku mugoroba wo kuwa gatanu ikipe ya Rayon Sports iza kwakira ikipe ya Gasogi United, ni mu gihe mu mukino ubanza n’ubundi wafunguye Shampiyona Rayon Sports yari yatsinze Gasogi United ibitego 2-1.
Ikipe ya APR FC iyoboye urutonde rwa Shampiyona iratangirana ikirarane kuko umukino yagombaga gukinamo na Marine FC ku cyumweru taliki ya 14.1.2024 wimuwe kubera ko iyi kipe ya APR FC imaze iminsi mu mikino ya Mapinduzi Cup, aho yasezerewe muri 1/2 na Mlandege yo muri Zanzibar kuri penaliti 4 – 2, mu minota 90 isanzwe amakipe yari yanganyije ubusa ku busa.
Umutoza w’abanyezamu Ndizeye Desiré Aimé “Ndanda” yahise atangaza ko iyi kipe itazagaruka muri iri ruhsnwa kubera ibyo yise kwibwa n’abasifuzi.
APR FC iri gushakisha uko igaruka mu Rwanda kuri uyu wa gatanu, ariko hagati aho ikomeje imyitozo muri Zanzibar yitegura umukino ubanza wa 1/8 mu gikombe cy’amahoro izahuramo na AS Kigali kuwa 17.1.2024
Imikino y’umunsi wa 16
Kuwa gatanu taliki ya 12.1 saa 18h00 :
Rayon Sports vs Gasogi United
Kuwa gatandatu, taliki ya 13.1 saa 15h00 :
Bugesera FC vs As Kigali
Musanze FC vs Etoile de l’Est
Mukura VS vs Amagaju FC
Gorilla FC vs Etincelles FC
Ku cyumweru taliki ya 14.1 saa 15h00
Sunrise FC vs Police FC
Muhazi United vs SC Kiyovu
