Tariki ya 19 Ukwakira mu Rwanda hategerejwe umukino ukomeye uzahuza Rayon Sports izakira mukeba wayo APR FC, hari amakuru ariko avuga ko uyu mukino ushobora gusubikwa kuko nyuma y’iminsi 4 ikipe y’igihugu izatangira amajonjora ya CHAN.
Uyu mukino n’ubundi wari uzanswe ari ikirarane kuko wari kuba ku munsi wa gatatu wa shampiyona tariki ya 14 Nzeri ariko kuri iyi tariki APR FC yari ifite umukino na Pyramid mu marushanwa ya champions league.
N’ubwo bivugwa ko uyu mukino ushobora gusubikwa ntibyabujije aya makipe yombi gusubukura imyitozo ariko adafite bamwe mu bakinnyi bayo bagiye mu makipe y’ibihugu. Rayon Sports biciye mu kiganiro cyayo Rayon Time yakunze kuvuga ko itifuza ko uyu mukino usubikwa ndetse ihamagarira inzego zishinzwe umupira kwirinda gufata iki cyemezo.
Ombolenga Fitini myugariro wa Rayon Sports wanakinnye igihe kinini muri APR FC azi cyane ubukana bw’umukino uhuza aya mkipe yombi. Abona kuba bazaba babura iminsi 4 ngo Amavubi atangire amajonjora ya CHAN bitatuma uyu mukino usubikwa.
Ubwo itangazamakuru ryamusanga mu mwiherero w’ikipe y’igihugu yavuze ko “Mu by’ukuri umukinnyi abereyeho gukina nibapanga ko tugomba kuyikina match(umukino) aho hagati tugomba kuyikina jyewe nta kibazo nabibonamo kinini cyane.”
Shampiyona y’u Rwanda igeze ku munsi wa 5 ariko ubu yabaye ihagaze kuko ikipe y’igihugu nkuru iri kwitegura imikino ibiri izayihuza na Benin mu mikino yo gushaka itike yo kujya mu gikombe cya Afurika (CAN).
