Amakipe ya APR y’abagore n’iyabagabo mu mukino w’amaboko wa Volley Ball yegukanye ibikombe bya shampiyona batsinze Police W VC na Kepler imikino 2 kuri umwe.
Mu bagore umukono wa kamaparamaka wabaye kuri iki cyumweru tariki ya 26 Gicurasi mu buryo bugoranye APR yawutsinze ku maseti 3 kuri 1. Iseti ya mbere APR yayitsinze ku manota 27 kuri 25, yahise itsinda n’iya kabiri ku manota 25 kuri 24.
Police yisubiyeho itsinda iya 3 ku manota 25 kuri 14 ya APR, iseti ya nyuma yatwawe na APR ku manota 29 kuri 27, Police yabuze igikombe nyamara ariyo yari yatsinze umukino ubanza amaseti 3 ku busa naho uwa kabiri APR iwutsinda ku maseti 3 kuri 2.
Ibi byatumye hitabazwa umukino wa kamarampaka ari nawo APR imaze gutsinda itwara igikombe. umwanya wa gatatu muri iyi shampiyona y’abagore watwawe na RRA itsinze Ruhango imikino 2 ku busa yombi ku maseti 3 kuri 1.
Mu Bagabo APR VC nabwo yatsinze Kepler imikino 2 kuri umwe, Kepler niyo yatsinze umukino wa mbere amaseti 3 kuri imwe, naho APR itsinda uwa kabiri amaseti 3 kuri 2. Nabo byabaye ngombwa ko bitabaza umukino wa kamarampaka maze APR iwutsinda ku maseti 3 kuri 1.
Iseti ya mbera yarangiye ku manota 25 kuri 19, iya kabiri nayo APR yayitsinze ku manota 25 kuri 23 , Kepler yatsinze iseti ya gatatu kuri 25 ku manota 22 ya APR. Iseti ya nyuma yagoranye APR yayitsinze ku manota 29 kuri 27 ya Kepler. Umwanya wa gatatu mu bagabo watwawe na REG VC itsinze Police VC imikino 2 kuri umwe.
