Ingabo z’u Burusiya zarashe igisasu cyo mu rwego rwa misile ya karahabutaka muri Ukraine cyigwa ku cyambu cya Odesa gihitana abantu 4 gikomeretsa abandi 32 harimo abana 2 n’umugore utwite.
Byatangajwe na guverineri w’iyi ntara ya Odesa, Oleh Kiper, aho yavuze ko 4 mu bakomeretse bari kuvurirwa mu bitaro by’indembe.
Mu ijambo yagejeje ku baturage, Perezida Volodymyr Zelenskyy wa Ukraine yihanganishije imiryango y’abapfushije ababo n’abakomerekeye muri icyo gitero.
Perezida Zelenskyy yashimangiye ko Ukraine ikeneye intwaro zivuye mu bihugu by’inshuti kugira ngo ziyifashe kwihagararaho imbere y’u Burusiya.
Yongeyeho ko yaganiriye n’Umunyamabanga Mukuru w”umuryango wo gutabarana hagati y’ibihugu by’u Burayi n’Amerika (OTAN) Jens Stoltenberg, ku kamaro ko kwihutisha umusanzu w’intwaro uyu muryango wahaye Ukraine.
