Minisiteri y’Ubuzima mu Rwanda yashimangiye ko icyorezo cya Covid-19 gikurikiranirwa hafi bityo nta bwoba gikwiye gutera buturutse ku makuru atagenzuwe avuga ko hari abacyanduye.
Ni nyuma y’amakuru yakwirakwiye ku mbuga nkoranyambaga avuga ko hari abantu bagaragaweho Covid-19 mu Burengerazuba bw’u Rwanda nyuma yo gupima mu buryo bwa rusange byabaye kuwa 12-15 Mutarama 2024 bityo hakenewe kongera ubukangurambaga bushishikariza abaturage gukaza ingamba zo kwirinda.
Umuvugizi wa RBC, Julien Mahoro Niyingabira, yavuze ko Minisiteri ntacyo izi ku makuru y’uko hari abanduye Covid-19 bityo adakwiye guhabwa agaciro. Yavuze ko nta Covid-19 iri mu Rwanda kandi abantu bakingiwe n’imiti ikaba ihari ku mavuriro yose, bityo icyorezo kitakiri ikibazo.
Umuyobozi w’Agashami gashinzwe gukurikirana indwara y’Ibicurane muri RBC, Dr. Mucunguzi Hugues, yavuze ko ibicurane biriho bidafite aho bihuriye na COVID19 ku buryo hakongera gushyirwaho ingamba nka guma mu rugo.
