Minisitiri w’Ubuzima, Dr Sabin Nsanzimana yatangaje ko hashize imyaka ibiri nta muntu wishwe n’icyorezo cya Covid-19 mu Rwanda, ni mu gihe abantu 1468 nibo bahitanywe n’iki cyorezo kuva cyagera mu Rwanda muri Werurwe 2020.
Yabivugiye mu biganiro yagiranye n’abasenateri bagize komisiyo y’imibereho myiza y’abaturage n’uburenganzira bwa muntu. U Rwanda ruri mu bihugu byashyizeho ingamba zo guhangana na Covid-19 aho abaturarwanda bahawe inkingo z’iki cyorezo kandi n’inzego z’ubuzima zigahugurwa ku kwita ku barwayi b’iki cyorezo.
Muri Gicurasi umwaka ushize Ishami ry’Umuryango w’Abibumbye ryita ku Buzima, OMS, ryemeje ko COVID-19 itakiri icyorezo cyugarije Isi, nubwo virusi yayo igihari ndetse ishobora no kwihinduranya.
